قال مغني المهرجنات حمو بيكا أنه حقق نجاحاً كبيراً في عالم المهرجانات الشعبية، قائلًا: ' أنه ساعد حسن شاكوش في بداية وجوده بعالم المهرجانات، 'علمته يقف أدام الميكروفون ويغني إزاي، وهو اللي جه يقولي عايز أغني معاك ومكنتش أعرفه، وهو مكنش عنده استوديو أصلاً، ووصف نفسه بأنه 'عمرو دياب الغلابة'.
مهاجمة حسن شاكوش
وأضاف حمو بيكا في برنامج 'شيخ الحارة' في حديثه عن حسن شاكوش ' أول أغنية عملتها له، جابت 15 مليون مشاهدة.. وأنا اللي طلعته للنور.. ولما اتشهر والغرور خده مني، بقى يعمل أغاني لوحده.. بس أنا المدرسة اللي طلعت حسن شاكوش'.
وأضاف حمو بيكا: 'حسن شاكوش بيحب السهر مش بيحب الشغل.. أنا بشتغل مش بسهر وهو مش مركز في شغله.. أنا العالم كله يعرفني ولكن هو لأ.. وساب مراته وراح يسهر ومراته بتنصحه بتقوله انزل اشتغل.. ومديرين أعماله بيسوحوه، كما هاجم عمر كمال، قائلاً: 'ورب اللي خلقني عمر كمال مابيعرفش يغني.. يعني إيه صوته حلو؟!.. هي مش بالصوت.. وأنا صوتي على قدي بس ليا جمهور كتير والناس كلها بتحبني'.
حمو بيكا واكتشاف عمر كمال
وتابع حمو بيكا، 'أنا مابعرفش أقرأ ولا أكتب بس أنا أسرع من عمر كمال وحسن شاكوش في إني أغني، ولما بييجوا يقفوا على المايك ويغنوا معايا بيبقى الأداء بتاعي أحسن وأسرع.
وأضاف 'أنا اللي اكتشفت عمر كمال، بعد ماكان بياخد 400 جنيه في الأوردر.. وكل اللي ساعدتهم ووقفت جنبهم باعوني عشان أنا أهبل وحظي وحش وأستاهل، وكانوا بياخدوا 400 جنيه دلوقتي بياخدوا 40 و50 ألف بسببي.
