أخبار متداولة كثيرة عن قطع الكهرباء المتكرر في دولة الكويت الشقيقة بسبب درجات الحرارة المرتفعة والشديدة، فهل حقًا الوضع مجرد عرض طاريء أم أن هناك بالفعل جدول تخفيف أحمال تستعد الحكومة لتطبيقه ؟ ننقل لكم تحليل حول الوضع في الكويت من المصري محمد بن سامي على موقعكم المفضل صحيفة السعودي اليوم.
هل جدول تخفيف الأحمال في الكويت حقيقي ؟
نقلًا عن حساب المصري محمد بن سامي:
بيقولك الكويت عملت جدول لتخفيف الأحمال ؛ دا نص الخبر في كل الجرايد وبشعور فرحانين و انتم فاهمين ليه... طيب ايه اللي حصل بقي بجد بدون أفورة صحفية ولا برضك إنكار الذات.
*️⃣ الكويت تجاوزت الحرارة ال 50 درجة؛ وقدرة المحطات الكويتية عند ال 50 بتقل تحت 80% وممكن 75% كمان؛ المحطات الكويتية كلها مبقتش قادرة تنتج. ومكانش عند الكويت محطات مقفولة لعدم وجود غاز ليها فتشغلها بدل ما هي مركونة مقفولة بتدفع اقساطها... لا هي شغلت كافة المحطات وجابت آخرها قدرتها الانتاجية.
*️⃣ الكويت راحت للشبكة الخليجية الموحدة اخدت منها 400 ميجا وبرضك مكانوش كفاية... فهنا السيستم عمل عندهم تخفيف أحمال تلقائي ما بين ال 1 الي 2 ساعة.
*️⃣ الحكومة طلعت قالت (بصراحة معتذرتش 😂 تحسها جينات عدم الاعتذار للكائن المواطن) وقالت توضيح ايه اللي حصلت وقالت للمواطن قللوا استهلاك شوية من 11 ل 5 العصر والا قد نضطر تاني لتكرار قطع الكهرباء..
*️⃣ بعدها الحكومة نزلت جدول مناطق وقالت لو الحرارة خرجت عن السيطرة هيتم القطع في المناطق دي؛ يعني قالوا لو تكررت الحرارة دي والاستهلاك دا هنقطع تلقائي عالجدول دا؛ الجو كويس والكهرباء مفيهاش عجز مش هنقطع ؛ يعني مش جدول يومي صيف شتاء الجو برد الجو حر شغال ملناش فيه لكن جدوا مكتوب فيه نصاً (في حال استدعت الحاجة لذلك).
*️⃣ الفكرة إن البيان ملوش لازمة فعليا ومش هيحل أزمة لإن الكهرباء سلعة صعبة؛ وأصعب حاجة هي إن الحل بناء محطات ودا بياخد 2 إلى 3 سنة فطبعاً دي كارثة وسوء تخطيط لإنها مش مفاجأة إن الدنيا حر في الكويت.
*️⃣ لكن برضك عشان نبقي عادلين فالحكومة الكويتية كانت في يناير 2023 أعلنت خطة لرفع قدرة المحطات الكويتية من 20 جيجا وات ل 27.5 جيجا وات خلال 5 سنين لكن الخطوة متأخرة... بالمناسبة لما نقول قدرة 20 جيجا فدي بالظروف والطقس العادي لكن مع حرارة فوق 50 فالقدرة دي ممكن تنزل ل 15 جيجا... الطلب المحلي 16 او 17 جيجا فعشان كده حصل العجز... الحرارة بتقلل قدرة المحطات على الانتاج.
*️⃣ الحل التاني هو حل الدول اللي معاه فلوس كثير ومصر عملته وهي محطات سريعة اسمها محطات الخطة العاجلة؛ دي مصر جابتها في 2014 ب 2.6 مليار دولار شغلناها ووقفنا انقطاع كهرباء لغاية ما عملنا المحطات الحقيقية اللي بتاخد 3 سنين دي؛ وفي 2017 بدخول المحطات الحقيقية الخدمة قفلنا محطات الخطة العاجلة... دا ممكن يبقي حل كويس للكويت تصرف 3 مليار دولار مثلا في محطات سريعة تحل المشكلة وبعدين تقفلها عادي... الصندوق السيادي الكويتي اصوله تجاوزت 920 مليار دولار فعادي يعني 3 مليار دولار لمحطات مؤقتة وتتقفل بعدين وتترمي.
*️⃣ طبعاً في حل إضافي وهو ربط خطوط جديدة مع السعودية بس دا هياخد وقت وسنين فمش عملي قوي.
*️⃣ خلاف ذلك فالكويت هتنضم لنادي تخفيف الأحمال العربي وقطع الكهربا واللي بيتصدره سوريا ولبنان والسودان ومعاهم مصر والصومال وتونس وجيبوتي والعراق واليمن وموريتانيا وجزر القمر 😔
منورين يا عرب
الصورة لرسم بياني يوضح كفاءة الانتاج مقابل درجات الحرارة
كفاءة الانتاج مقابل درجات الحرارة
المصدر:
